There are really 3 components in question:
The first is a the standard flexible gasket (ERR3284), that has subsequently been replaced with an improved aluminium version (PET100790). The second has to do with the radiator hose coming loose or even failing. Then lastly the over tightenning resulting in damage or stripping of a plastic radiator filling plug.

Verskeie ontstoke eienaars van Land Rovers, en spesifiek die Discovery TDi-model, kruis opnuut swaarde met Land Rover SA met bewerings dat 'n gebrekkige onderdeel moontlik aanleiding kon gee tot oorverhitting en gevolglike enjinskade aan hul viertrekvoertuie.

In al die gevalle wat onder Tot u Diens se aandag gebring is, het die enjins oorverhit nadat 'n pakstuk na bewering onklaar geraak het. Voorts het die temperatuuraanwyser na bewering in al die gevalle nie aangetoon dat die enjin verhit nie, en was die skade reeds gedoen voordat die aanwyser in werklikheid aangetoon het dat die temperatuur te hoog is.

Dr. Hannes Swart van Pretoria was een van die Discovery-eienaars wat verlede jaar sowat R60 000 moes opdok om die enjin van sy voertuig te vervang. Hy het R185 000 van Land Rover SA geeïs - die aankoopprys wat hy aanvanklik vir die voertuig betaal het. Dié eis is van die hand gewys deur Land Rover SA.

Van die aantygings wat gemaak word, is dat Land Rover SA na bewering bewus was van die feit dat die aanvanklike pakstuk, wat buigbaar en materiaalagtig voorkom (onderdeel ERR 3284), inherente defekte gehad het wat regstreeks aanleiding gegee het tot die oorverhitting van die enjins.

Dié spesifieke pakstuk is klaarblyklik later vervang deur 'n pakstuk van alluminium (PET 100790).

In die korrespondensie tussen Swart se regsverteenwoordigers en Land Rover SA het laasgenoemde by monde van hul regsadviseur verklaar dat "hy nie bewus is van enige opgradering van pakstukke wat weens 'n defek vereis is nie, maar dat onderdele van tyd tot tyd wel opgegradeer word vanweë nuwe tegnologiese voordele".

Voorts voer Swart se regsverteenwoordigers aan dat tegnici by verskeie Land Rover dienssentrums erken het dat dit moontlik is dat 'n enjin oorverhit sonder dat dit aangedui word op die temperatuurmeter in die voertuig.

In een van die ander gevalle het 'n splinternuwe Land Rover Discovery TDi van mnr. C. Knight oorverhit nadat hy dit slegs 'n week of wat gehad het. Herstelwerk aan sy voertuig is egter nog onder die geldige waarborg gedoen.

Mnr. Werner du Plessis van Pretoria was in dieselfde bootjie, maar sy eis om skadevergoeding is deur Land Rover SA van die hand gewys omdat die voertuig nie meer onder waarborg was nie en die voertuig 'n keer of wat deur nie-goedgekeurde Land Rover-werktuigkundiges herstel is.

Du Plessis meen egter dat die pakstuk inherent foutief was en dat sy eis in die lig daarvan toegestaan behoort te word.

Hoewel die onderskeie klagtes, en spesifiek dié van Swart, reeds sowat drie weke gelede aan Land Rover SA voorgelê is vir kommentaar, is nog geen antwoord ontvang nie.

Met dié dat Land Rover SA uit die stal van BMW na dié van Ford is, is die kliëntedienssentrum van Land Rover SA voortaan laasgenoemde voertuigvervaardiger se verantwoordelikheid.